ដោយ៖ឧត្តរ
ឧត្តរមានជ័យ -ឯកឧត្ដម មាន ចាន់យ៉ាដា អភិបាលខេត្តឧត្តរមានជ័យ បានអះអាងថា រូបចម្លាក់ “ពស់យក្ស” ដែលធ្វើឡើងពី ចំរៀកឬស្សី និងបានដាក់តាំងនៅលើតំបន់សួនច្បារមុខតំបន់រដ្ឋបាលខេត្ត គឺជាស្នាដៃច្នៃប្រឌិត និងមានតម្លៃខ្ពស់ដែលបង្កើតឡើងដោយ ប្រជាពលរដ្ឋក្នុងក្រុងសំរោងផ្ទាល់។
ឯកឧត្តម មាន ចាន់យ៉ាដា បង្ហាញការភ្ញាក់ផ្អើល និងមិននឹកស្មានថា ប្រជាពលរដ្ឋក្នុងស្រុកអាចបង្កើតបានស្នាដៃដ៏អស្ចារ្យមួយនេះទាល់តែសោះ ក្នុងការត្រៀមទទួលស្វាគមន៍ ឆ្នាំថ្មី ២០២៥។ រូបពស់យក្សនេះ មិនត្រឹមតែជារូបសម្បត្តិសិល្បៈអស្ចារ្យនោះទេ ប៉ុន្តែជាការបង្ហាញពីស្នាដៃ នៃការច្នៃប្រឌិតផ្ទាល់របស់អ្នកស្រុកក្រុងសំរោងផ្ទាល់។
ឯកឧត្តមអភិបាលខេត្ត បានកោតសរសើរនិងលើកទឹកចិត្តដល់ប្រជាជនក្នុងការរក្សាចំណេះជំនាញ និងបន្តអភិរក្សសិល្បៈដែលមានការច្នៃប្រឌិត ដើម្បីឲ្យសម្បត្តិវប្បធម៌ដ៏ល្អនេះ បន្តអភិវឌ្ឍក្នុងសង្គមកម្ពុជាយើង។ពស់យក្សនេះ មិនមែនត្រឹមតែជារូបចម្លាក់បានឃើញនៅសកម្មភាពការរួមចំណែកសហការរបស់ប្រជាជនយ៉ាងសកម្ម ដើម្បីអភិវឌ្ឍសហគមន៍របស់ខ្លួន។ហើយនេះជាសញ្ញាបង្ហាញថា ប្រជាពលរដ្ឋខេត្តឧត្តរមានជ័យ មានសមត្ថភាព និងសិល្បៈច្នៃប្រឌិតខ្ពស់ អាចជះពន្លឺដល់ការអភិវឌ្ឍទេសចរណ៍ និងវប្បធម៌នៅក្នុងតំបន់បានយ៉ាងល្អទៀតផង៕
